عدى فات ..... ك صلاح حاج سعيد

عدي فات زمن العيون الالفه والحضن الملاذ
ورهافة الحس البلون ضحكة الناس العزاز
بعد الحنان الكان زمان
استوطن المطر الحراز
روح زماني و في رجاك عانيت قساوة الانتظار
في ضل شبابيك السفر
صادقت ليلات المواني الساكنة في بحر الاماني بتنتظر
لو يوم طيوف لحظك تفوت
تعبر خيالاتك تمر
قلق المواعيد الضجر
سهر العيون الاحتراز
و اتعزز النوم الخزاز
واتمدد الشقي في العمر
مليت تباريح الجراحات البقت بعدك اسي
وزمنا قسي و حالا اسيف
و مشيت افتش عن خطاويك القبيل
و اضاري من زمنا وراك ملاني خوف
واحتجت ارتاح في عيون
فيهن ملامحك ذاتا من غير اي زيف
واحتجت لي ضحكة صباحك والدعاش
عطر رزاز مطر الخريف
وانا وانت والدنيا الامان
والناس وفا وخوة صفا
ودفء المشاعر الشاتية صيف
وانا وانت و الدنيا الامان
زمن الغناوي الطالعة من قلبا رضي
وحسا ندي وزوقا رهيف
وانا وانت والدنيا الامان
ما العمر شتان بين اوان زمنا حييتو
و عمر مابتقدر بتعرف بكرة يصبح حالو كيف