افندينا انعم علينا بعلاوة - احمد فؤاد نجم

افندينا انعم علينا بعلاوة
تجيب كيلو جبنة وعلبة حلاوة
اتاري العلاوة مجرد اتاوة
ةاحنا علينا الكلام اختلط
****
عشان في البداية حسبناها خير
وقلنا نواية حتسند يا زير
وحسنة حتمنع بلاوي كتير
وكنا حقيقي في غاية العبط
****
في لحظة افتكرنا ان لينا حقوق
ونمنا وصحينا ولقينا الخازوق
وقبل اما حتى يا عالم نفوق
لقينا اللى لسه حناخده اتشفط
****
افندينا يعني في لحظة تجلي
تعطف تلطف وقرر يخللي
مساحة الغلابة تزيد ستة مللي
وياكلو بدل التراب الزلط
****
افندينا اعلن صدور القرار
وقبل اما ينجح في اي اختبار
فوجئنا بزفة و مولد وزار
قصايد...جرايد...برامج...يفط
*****
تؤكد بأن الحكومة ...بذكاء
ومن حزمة واحدة قضت ع الغلاء
و لا بد يبقى لدينا ...انتماء
وناكل ونشرب ونلبس خطط
****
عبال النمو اللي قالوا عليه
وحايشنه عنا مانعرفش ليه
ما تلمح مكانه في مراية عينيه
ونقدر ندوق منه ...حتى نقط
****
مادام كل حاجة تمام ع الورق
مفيش اي داعي عشان القلق
و لو مش مصدق خلاص اتفلق
ورقنا الصح و كلامك غلط
****
قاللي مواطن عليم بالخبايا
افندينا قرر تزيد الجباية
عشان شعبه جاحد قليل الرباية
بياكا وينكر زي القطط
****
اذا الشعب صدى بفعل البارومة
حاتعمل حسابه ف ايه الحكومة
وهي اللي جاهذة بكرباج وشومة
عشان لو في واحد في عقله اتخبط
****
تعيش مصر دايما في عز وجمال
يعيش المواطن شديد الاحتمال
وامن تماما من الاشتعال
واقصى ما عنده بنكت فقط