بقلم المبدع الرائع / ود الماجد :
تذكروا (برشلونة) .. الوصلوها اسوان .. قالوا شنو ؟ .. قالوا برشلونة عاوزة تلعب معاهم في الرد كاسل.
* برشلونة عيشتها طارت.
* نحن نشيل ونصدق.
* شهر .. شهرين شفنا ليك جمال الوالي في برشلونة مع (خوان لابورتا) رئيس نادي برشلونة .
* هسع دا ما فيلم هندي.
* قالوا شنو؟ ... قالوا عملوا (توأمة) مع برشلونة.
* نحن موضوع (التوأمة) دا مصدقنو ... عشان برشلونة من توقيع (التوأمة) دي تاني ما شاف ليه عافية.
* برشلونة مسكت فيه (الوصفنة) .. برشلونة بقي (وصيف) شعبي ورسمي.
* أي بطولة يشارك فيها يطلع منها (وصيف).
* عشان كدا حكاية (التوأمة) دي تب ما مغالطينكم فيها.
* الموضوع مشي علي هذا الاساس ونشرت الصحف كلها صورة جمال الوالي مع (الزميل) او (النظير) خوان لابورتا رئيس نادي برشلونة.
* نظام شنو؟.
* نظام زملاء وصافة وكدا.
* الموضوع دا مشينا.
* قاموا نطوا لينا تاني في موضوع تاني.
* قالوا (انترميلان) ح يزور الخرطوم.
* في شنو يا جماعة؟.
* قالوا جمال الوالي قدم دعوة لانترميلان عشان يلعب مع المريخ في الردكاسل.
* دل........
* هسع دا ما فيلم هندي.
* ما فيها حاجة لو انترميلان جاء الخرطوم ولعب مع المريخ في الحر دا.
* عادي.
* نحن طيبين ... صدقناهم.
* وفي ناس ما عاوز اقول اسماءهم قطعوا التذاكر.
* انترميلان قالوا وصل عطبرة ..
* اصلوا انترميلان دا فاضي وماعندو أي ارتباطات.
* مع ذلك وصولوا عطبرة ورجعوا .. قالوا الدوري حقهم بدأ .. ما بقدروا يصلوا الخرطوم.
* ظروف نعمل ليهم شنو؟.
* مشينا الموضوع .. وما وقفنا فيه.
* قاموا قالوا شنو؟. . قالوا كاظم الساهر.
* كاظم الساهر عيشتو تطير .. مالو كمان كاظم الساهر ؟.
* قالوا عاوزين يجيبوه الخرطوم.
* يا جماعة انتوا قاصدين شعبان عبدالرحيم وإلاّ كاظم الساهر؟.
* قالوا قاصدين كاظم الساهر ... كمان ما بنعرف كاظم من شعبولا.
* كاظم الساهر دا متين عمل ليه فريق؟.
* قالوا نحن ما عاوزين نلعب معاه .. نحن عاوزينو يغني لينا في الردكاسل.
* حجزوا الفندق .. طلعوا التذاكر .. وعملوا الاعلانات.
* ونحن نشيل ونصدق.
* يعني شنو لو جابو كاظم الساهر يغني ليهم علي الاقل يخفف (الوصافة) شوية.
* انتوا كمان يا الهلالاب عاوزين تمنعوهم الغنا.
* هسع دا ما فيلم هندي .
* مرة شهر .. شهرين .. تلاتة .. اربعة .. خمسة .. لا شفنا كاظم ولا شفنا الساهر ولا شفنا شعبولا.
* يكون حصلت ليه ظروف.
* المريخاب ديل اصلهم في كل وصافة بعملوا كدا.
* الطابق التاني عندهم اسهل من جدول اتنين.
* كل ما يضايقوا يقولوا الطابق التاني.
* الغريبة جابوا (السيخ والطوب) .. وطلعوا التصديق.
* واقفين بس علي اللمسة الاخيرة.
* جمال الوالي دا زول ذكي لو عمل الطابق التاني .. تاني يقول شنو للمريخاب؟.
* الطابق التاني دا بس يوريهم طوبو وسيخو والباقي بتموا اعلام المريخ.
* الحاجة الظريفة جمال الوالي المرة دي بعد خسارة المريخ من شبيبة القبائل طلع ليهم بي حاجة جديدة.
* قال عاوز يعمل (اكاديمية).
* اكاديمية مرة واحدة .. دي ما كانت العاب نارية.
* شغل انتخابات ساكت.
* ونحن نشيل ونصدق .. كل ما يقول لينا حاجة .. نحن نصدق.
* هسع دا ما فيلم هندي.
* السنة قبل الماضية دفعوا في المعز محجوب مليار جنيه .. وصلوا بيه صينية التاكسي التعاوني.
* والسنة الماضية سجلوا عمر بخيت ومهند الطاهر وريتشارد وحمودة بشير.
* والسنة القبلها علاءالدين يوسف قالوا حسموا امره ووقعوا معاه اقرار ..
* زوروا البصمة واكدوا احقيتهم باللاعب.
* وقبل ذلك حسموا امر كلاتشي مع وكيله.
دل .. دل .. دل دي مني انا للوصيفاب
موضوع: برشلونة ومرض الوصافة 
21st أكتوبر 2008, 17:07
