ياغربة يابكايا ياغشاشة يامستهبلة
تغرينا بي درهم قروش وراه قنطار بهدلة
جيناك نقعد بس سنة وحياتنا ناقصة نكملها
نبني البيوت في العاصمة ونفرش أثاثها نجملها
وكرولا حارة نرسلا اصلو النقل صار مشكلة
ونكمل الدين بي مهل والسمحة جاهزة نحصلها
غير القروش اللي الأهل عبر الشهور بنرسلها
والباقي يدخل في البنوك ونشوف دبارة نشغلها
ناس فكرت تجني العلم وتبدا الدراسة وتواصلها
احلام كتيرة وشيقة وامال كبيرة مدنكلة
لكن حساباتنا الغلط في كل عام بنأجلها
مرت سنين من العمر بنعزها ونفضلها
والحسبة وصلت طاشرات ممكن نعيش وندبلها
وتعال نحاسبك ياوهم من غير رقم او امثلة
كمان للقروش نجري ونحوش لكن تقول بنشاكلها
ماراضية تقعد في الجيوب وتقول حرامي بينشلها
لكن بترقد في الضهور بديون تقيلة مطولة
ممحوقة مابتقضي الغرض واقل حاجة بتكملها
كملانة بطحا وحق وزن ومجاملات مستفحلة
ضرائب أبعاج ندفعها والزامي حمدي نحولها
واحلامنا ديك صبحت سراب نمشي ونجري مانحصلها
ياريت يكون هم القروش ياقربة فيك هو المعضلة
لكن تعال شوف الهموم الما افتكرن نقابلها
ذلة ومهانة خلو النفوس متململة
سجنا كبيرا فيهو الكفيل سجان قيوده مكبلة
أشغاله شاقة ومؤلمة ودائما مستعجلة
مرض الضغط والسكري ومرض القلب ووجع الكلى
ومصران وقرحة واكتئاب ونفوسنا ما مستحملة
وبقينا كيمان لحم تحت الهدوم متندلة
واكيد حيكون اكل المعلب والمجمد عاملها
عدم الرياضة والكندشن اكيد حيكون ليهم صلة
وكمان تعال لي معادلة ماقدرن اصلانعدلها
سجن العيال جوا الشقق ولافراق العائلة
جيب العيال بي جيبنا مال وجيوبنا غيرو مميلة
وصغارنا صبحت بالزهج متوحشة ومتجفلة
لاقادرة تدرس بي نفس من الدروس المذهلة
تلق الولد غالبو الكلام والت كبيرة مريلة
كل الضغوط جاتم سوا ماقدرنا حتى نقللها
في كل طرف تلقى الفرف وتلقى الخيوط متداخلة
اما الفراق اصل الوجع ومشاكلو بايتة ومقيلة
كل زول مفارق عارف كيف؟مفي داعي ابدا نفصلها
ياغربة اديناك كتير ادينا خاطرك يسهلها
خلينا نرجع بالفضل نلحق حياتنا نعدلها
آمالنا فيك بدري اتنست إلا الرجول متوحلة
وبقينا زي اهل القبور لا البرة عارف يدخلها
ولا الجوه يرجع لي ورا يحكي الحقيقة يوصلها
لكن خلاص هان الخلاص عدك نزل مهما علا
وان شاء الله نحيا نودعك وتكوني ذكرى نغازلها
ياغربة يابكاية ياغشاشة يامستهبلة
الكاتب القصيدة دي اسمو معتصم الامام وابدو بآرائكم ماتتأخروا
موضوع: للمغتربين فقط 
3rd سبتمبر 2008, 11:03
