زوووووووووووووولة..... جمال حسن سعيد

زوووووولة تفتح الروح ضلفتين
تخشك تمرقك
بل تساسق بين شفقتك وحرقتك
عادى تخشك تمرقك ما بتأذنك
ما روحها نفاج غربتك
هذه البنية الساكنة اسرار فكرتك
هى الشايلة حسك وسترتك
زووووووووووووووولة
كلنورس تجى تنزل شواطى الالفة والزمن الشفيف
وانا ذى مكتف فى الرصيف
مربوط على حبل السفن
فى الضلمة والليل المخيف
بتجينى تدخلنى وتقيف
شرشرتة تيبان السكات
على ارض رويانة وخريف
زولة بتعرف تدخلك
وتقفلك
وتغـــــــفلك
تقعد على ناصية هواك وتشغلك
وانت بتحنس غمام
عشان تجعلك مطرة ودعاش
داير تحلق فى السما ء وارضك فراش
هذا الفراش بطير على نضرة رحيقة وخضرتة
ومحبتة
اومشيتة
ومحنتة
او ضحكتة وسخريتة
وتقعد تهضرب يا ولد من حمتة
ولو تسألك وتحلفك فى زمتك الى متى هذا الجنون والى متى
كل التفاصيل لمتة
هذه البنية قد اتت وانت ذاتك كل الورق
من زكرياتك تنجو وين وين مهربك من دفترك
من مصدرك
من مظهرك
من جوهرك
من حرقة الجوف والعرق
هذه البنية تفتح الروح ضلفتين وعلى ضفتين
فى نهر احزان الزمن
تقعد تلوح باليدين
زووووووووووولة تخشك تمرقك ما بتأذنك ما روحها نفاج غربتك
هذه البنية الساكنة اسرار فكرتك هى الشايلة
حســــــــــــــــك
وسترك