قصة حب بين ود ابرق وعشوشة

تعريف:
ود ابرق: ذكر من انواع الطيور
عشوشة: انثى من انواع الطيور الجميلة
.................................................. .......

يا جماعة ود ابرق دة بيحب عشوشة حب ما عادى يتلاقوا كل يوم فى فرع شجرة ... ويوم الخميس يتلاقوا فى راس عمود فى طرف الحلة .. ومرات يكون فى سلك الكرباء بتاع الضغط العالى عشان هو عالى وعشان يكونوا بعيدين من الشمارات ... المهم الشباب ديل عايشين احلى قصة على مستوى الحب... وفى احدى الليالى الجميلة وهم فى قمة النشوة
ود ابرق : يا عشوشة انا خلاص قررت اتقدم رسمى واطلب يدك للزواج
عشوشة: دة كلام شنو يا خى دي نغمة اول مرة اسمعها.
ودابرق: ما هو ماممكن نتلاقى كل مرة بالدس وصراحة انا عاوز انتهى من الموضوع دة بأسرع فرصة
عشوشة : والله ياود ابرق بكل صراحة انت كل واحدة تتمنى ترتبط بيك وصاحباتى كاتلاهن الغيرة .. وفيك كل الصفات البتمناها .. لكن!!
ود ابرق : لكن شنوو؟ احسن نكون واضحين.
عشوشة: مشكلتك الوحيدة انك مفلس!

هنا ود ابرق التقول صبت فيه مطرة

قرر ودابرق عشان خاطر عشوشة يفعل المستحيل ولازم يتوج هذا الحب بأجمل عرس تتكلم عنه جميع الطيور الموجودة وحتى المهاجرة..

المهم فى النهاية قرر ودابرق انو لازم يسافر السعودية ويغترب عشان يلم الضحاكات .. وصاحبنا طوالى قام أشر العمرة (وزوغة) وسافر ..
عند لحظات الوداع كان العناق الحار بين العشيقين وأخذ كل منهما وعدا على الاخر بعدم نسيان هذا الحب الكبير..
.................................................. .................................

إجتهد ودابرق كثيرا وإشتغل جميع الاعمال الصعبة من العتالة والسرحة بالبهايم وحفر الابار وكان بيجوع ويستكثر على روحوا ما لذ وطاب عشان خاطر عيون عشوشة...
وكان كل مايجى جنب محل فيه ما يملى العين يقول بين نفسوا لازم استحمل عشان عشوشة.. وكلو يهون..
المهم بعد كم سنة ودابرق جاء راجع الديار وهو محمل بالشنط وجاب معاه مروحة واكياس مليانة تانك وعصاير ولبن بدرة (ما جايى من السعودية وكدة)
اول ما خش الحلة لاقى الشباب قاعدين فى سلك كهربا..
ودابرق: السلام عليكم..
صوت من الشباب : عليكم السلام .. منو ؟ ود ابرق لا لالا.. حمدا لله على السلامة .. متين الجية؟,
ودابرق : بعد ان استعدل الكارافيتة والله (الحين )جيت

نظر باقى الشباب لبعضهم فقد تغيرت لغة ود ابرق كما شكله .. هلا هلا هلا ما الخليج وكدة..
.................................................. ................

المهم ود ابرق سأل الجماعة من محبوبته
ودابرق: يا شباب عشوشة وين؟؟
واحد من الشباب بخبث واضح: انت من زمن عشوشة ما زمان رختك وباعتك .. وحاليا عايشة قصة حب يتكلم عنها الجميع..

ود ابرق فاغرا فاهه: وهسى هم وين؟
صوت من الشباب : والله ما عارفين لكن كل يوم الساعة 2 بالنهار بيتلاقوا فى الشجرة دييييييييييييك الجنب المدرسة..
.................................................. .

ود ابرق من الصباح مشى حلق واستحمى وعمل ليه سكسوكة رهيبة وهاك يا عطور .... وقشر ليك قشرة مجنونة... لبس ليك بنطلون جينز وقميص كاروهات ونظارة اخر موديل وجزمة كلارك... وشال الموبايل الاخر صيحة الجابوا معاه من الخليج..
.................................................. ...................
لما قربت الساعة من 2 ظهرا طار ووقف جنب حيطة المدرسة عشان يشوفهم لما يجو .....
ومن بعيد شاف ليك عشوشة طايرة وقدامها واحد طويل وعريض المنكبين وبعدين شكلوا مرطب .....
.................................................. ........

وخلااااص الجماعة بقوا قريبين من الشجرة

.................................................. .........

وفى نفس اللحظة اراد ود ابرق ان يفاجأهم

...............................................

وانتظر حتى يقتربوا اكثر واكثر!!

.................................................. ....................

وفى نفس اللحظة التى اراد فيها ود ابرق ان ينقض عليهم وهو يملك عنصر المفاجأة .... فى واحد من الطلبة شايل نبلة قام ضرب ود ابرق وكتلوا...........................

قووووية جد وجااامدة

لكن ياكابو عشوشة دى عرفتها .....ود ابرق دا قاصد بيهو منوووووووووو؟؟

قصة مؤثرة
هههههههههههههههههههههههههههههههههههههههههههههههههههههههههههههههههههه
الله يجازى اللى كان السبب